ترپنمه٬ آماندير!
ترپنمه، آماندير بالا! غفلتدن آييلما.
آچما گؤزونو، خواب-ى جهالتدن آييلما،
لاي لاي٬ بالا لاي لاي !
يات٬ قال دالا لاي لاي !
آلدانما آييقليقدا فراغت اولا، هئيهات !
غفلتده كئچنلر كيمي لذذت اولا، هئيهات !
بيدار اولانين باشي سلامت اولا، هئيهات !
آت باشيني يات، بستر-ى راحتدن آييلما،
لاي لاي، بالا لاي لاي !
يات، قال دالا لاي لاي !
آچسان گؤزونو، رنج-و مشققت گؤره جكسن،
ميللتده غم، اوممتده كدورت گؤره جكسن،
قيلديقجا نظر ميللته، حئيرت گؤره جكسن،
چك باشينا يورغانيني، نيكبتدن آييلما،
لاي لاي، بالا لاي لاي !
يات، قال دالا لاي لاي !
بير لحظه آييلدينسا، قوتار جانيني، يوخلا،
آت تيرياكيني، مئيل ائله قليانيني، يوخلا،
اينجينسه ساغين، سول يانيني وئر يئره، يوخلا،
ايللرجه شوعار ائتدييين عادتدن آييلما،
لاي لاي، بالا لاي لاي !
يات، قال دالا لاي لاي !
گؤز نورودو اويخو، اونو دور ائتمه گؤزوندن،
يول وئرمه، مبادا چيخا بير آن سؤزوندن،
آمما ائله برك يوخلا كي حتتا گئت اؤزوندن،
آفاقي توتان شور-و قييامتدن آييلما،
لاي لاي، بالا لاي لاي !
يات، قال دالا لاي لاي !
from: http://sabir-turkce.blogspot.com/
2 comments:
آقا مهدی صابرین شعرلری چوخ گؤزلدی . منده کتابی وار آما بعضی یازیلاری بیرآز سیلینیب .
شهربانو
سلام
ممنون از اینکه به من سر زدین
البته آدرس وبتونو نذاشته بودین
ولی من یه جورایی پیداش کردمو اومدم بهتون بگم خوشحالم از آشناییتون
راستی شما وب منو"وب ماویو" کی لینک کردین که خودم خبر ندارم؟؟؟
Post a Comment