جانا گلميشيک بيز بو جانان اليندن

جانا گلميشيک بيز بو جانان اليندن________که نه انس امان تاپدی نه جان اليندن
مسلمانه باخ، دين و ايمان قان آغلير________بو دين سيز ايمانسيز مسلمان اليندن
بو شيطاندی، بيز آدمی گويده تولار ________ قاچا بيلمز آدم بو شيطان اليندن
آلار اول ايمانی، سونداندای جانی ________ نه ايمان قالار ديبده نه جان اليندن
قاريشقا کيمی دئو نژادی قيميلدير ________ که خاتم چيخيب دير سليمان اليندن
بادمجان چوخی بازديلار کوچوکلر ________ دا ترپشمک اولماز بادمجان اليندن
پناه اولسا بيز خلقه کافر قوی اولسون ________ سيخينتی دوشک کفره ايمان اليندن
ائله تورشاديب ايرانين آيرانين که ________ گوزللر گوزی ياشدی ايران اليندن
ساليب دير اله، سانکی موسی عصاسين ________ قاچير اژدهالر، بو ثعبان اليندن
نه سلطانلار اولموش الينده اويونجاق ________ نه گلسين اويونجاقلی سلطان اليندن
بئش اوچ باش بيله ن ده قاليرسا، اوشاق تک ________ قاچيپ گيزلنيبلر بو خورتان اليندن
ائويم زيندانيم، ماموريم اوز ايچيمده ________ هارا قاچسين انسان بو زندان اليندن
بيز انسان اولاق يا که حيوان، امان يوق ________ نه انسان قوتارميش نه حيوان اليندن
نه دئولر که قيطانلا زنجيرلنيب لر ________ قنف لر قيريلميش بو قيطان اليندن
ساليب خلقي درمان آديلن نه درده ________ که درد آغلايير بيله درمان اليندن
او بيگ خان يازيقلار نه انسانيميشلار ________ عبث آغلايارديق او بيگ خان اليندن
وئررديک قديم ديوانا عرضه، ايندی ________ کيمه عرضه ورئرمک بو ديوان اليندن؟
نه طوفانه راست گلميشيک بيز، مگر نوح ________ گله قورتارا خلقی طوفان اليندن

شهريار